Ishq aik daastan hai...

Mohabbat ke asraar ki...

Anwaar ke qiyaam ki...

Amraha aur Aalyan ki...

Agar Amraha par pyaar ka koi laad ka naam hota to woh ‘Sarma ki dhoop’ hota. Par Surkhaab par udh kar aati, raaj hanson sang jhoomti, sunehri zarraat se muratassam Sarma ki dhoop uske siyaah baalon se shanaasai bartani laad karne lagi. Maaham (mehrbaniyaan) dharti par qiyaam ke liye us se apni ibtidaa par masroor hui... Sabze ki wusat par fida hoti is naazneen ko usne sar utha kar dekha aur us muskaraahat se muskaraa di jo uske ikhtiyaar mein to raha karti thi lekin istemaal mein nahi.....

Naye waqton ki aamad ne us ki samaaton ke super dohra sargoshiyan keen jo woh waqt ki guzar gaahon se ehtiraaman chura laayin thin...

Us ki... woh jo Amraha hai...

Laan ke kone mein woh aisay baithi hai jaise zindagi ki bisaat par woh aisa be naam mehra ho jis se maat di jaye na chaal chali jaye... Jo konon mein hi baithti hai... kyunki use manzar-e-aam par aane se darr lagta hai...

Kyun darr lagta hai?

Kyunkay use dhraya jaata raha hai aur phir us ki haisiyat apne hi ghar mein kuch aisi si hai jaise jhaadoo ki hoti hai... zaroori bhi aur... chhi... gandi bhi... Ek taraf baithi daadi zehar lab bar barate hue apne baalon ka khud hi massage kar rahi hain. Unhon ne Daniya se kaha tha lekin us ne aisay zahir kiya jaise us ne to kuch suna hi nahi... Daadi ne kaha hi nahi... aur woh kaamil tawajju se risala parhti rahi.

Saath maalton ki phankain bhi munh mein daalti rahi aur yeh sab karte woh kuch aisi nazar aa rahi thi ke jaise bechaari larki Daniya kal hi to apne MPhil se farigh hui hai aur Aaj kuch zara si duniya daar si nazar aa rahi hai.

Amaan phone par baat kar rahi hain aur Hammad kaanon mein earphone lagaye naya nyariip music se mutarif ho raha hai... kyunki use chalne mein khaasi dushwari ho rahi hai aur us ke dono haath hawa mein aisay mur mur kar lehra rahe hain ke Khuda nakhasta use tehalte tehalte murgi ka daura par raha ho... aur woh konon mein khud ko chhupane wali mobile internet par masroof hai... nahi nahi, woh kisi social networking site par nahi hai... woh kisi se chat bhi nahi kar rahi... aray nahi woh Google Images par designers ke kapron ke designs bhi nahi note kar rahi... woh to... woh to Manchester University ke Pakistan Student Society ke group leader ki email parh rahi hai aur us ke haath pair aisay kaanp rahe hain jaise abhi abhi use freezer se nikaal kar dhoop mein rakha gaya ho... ya jaise us ke kaan mein kaha gaya ho ke

"Jahan tum baithi ho theek wahi khazana dafan hai... chupke se nikaal lo."

Aur ab woh yeh khazana chupke se nikaal hi legi... us se apni cheech dabaye nahi dab rahi... aur yeh us ne halki si cheekh maar hi di...

Sab se pehle to daadi ne hi apna haath rok kar use naagawari se dekha, phir siwaye

Dada ke sab ne use koi ahmiyat nahi di aur apni intehaak ko qaaim rehne diya.

Dada jo tawbat al-nasuuh parhne ki koshish kar rahe they, us ke paas aaye.

"Amraha... kya hua?"

Pyaare Dada, sirf wohi poochte they. Woh dada ke kaan mein khusar phusar karne lagi. Thodi der baad Dada tawbat al-nasuuh seene se laga kar kharay huay aur sab ko sunane jaise andaaz mein kehne lage...

"Aamle lenay hain mandi se... mujh se kahan uthaye jayenge?"

"Itne... Amraha! Tum aa jao saath."

"Ise liye ja rahe hain... mil gaye phir... mandi band ho jayegi ya phir aag lagi."

"Hogi mandi mein," daadi ne us ke mutaliq apne khayalat ke izhar mein der nahi ki.

"Ham doosray shehar ki mandi mein chale jaayenge... agar wahan bhi aag lagi hui to."

"Hamara intezar na karna. Hum shehar shehar, mandi mandi aag laga kar aayenge."

Shehar shehar kyun... mulkon mulk kyun nahi?

Haan bhi ab tayyar rehna sab... duniya mein aag bharakne wali hai.

"Ab ki... kab ki bharak chuki," Daadi ne aisay kaha jaise agar yeh azeem sach na bola to un par kufr ka fatwa lag jaayega.

Bibi Amraha ne zara ghoor kar Daadi ko dekha, aur Daadi ne apna rukh badal liya.

"To kya ab mujhe bhi bhasm kare gi?"

Unhon ne khud par ayaat-e-mubarak parh kar phoonkein. Bohat khaufzada rehti thin is ki nazron se Daadi... sab hi rehtay thay. Tabahi aur barbaadi thi na woh... naek shagooni ki dushman, badshagooni ki dost. Kyunke ain us ki paidaish ke din:

— Baday Taaya chal base thay...

— Phoophi phoopha ka car accident ho gaya...

— Chhoti phuphi ke ghar short circuit se aag lag gayi jo sara saaz-o-saamaan nigal gayi...

— Chacha ki beti ki mangni usi din honi thi, taaya ki wafat ki wajah se multawi ho gayi... baad mein rishta hi khatam ho gaya...

— Aur maamu ke electronics ke store mein poore chaar lakh ki chori ho gayi. Maamu sadme se chaar din hospital mein rahe...

Amraha se bade Ali ki chhat se...Gir kar baen taang ki haddi toot gayi... jis ki wajah se poore 2 saal langra kar chalta raha... Saath ke ghar ki Malaika Aapa bewa ho gayin. Un ke shohar ka heart attack se inteqal ho gaya... Saamne ke ghar walon ki bahu ke murda bachay ki paidaish hui. Aur... aur bhi bohat kuch... fehrist kaafi lambi thi aur din ba din lambi hoti ja rahi thi. Misaal ke taur par agar koi kehta:

“Bas Amman ji, apne dhyaan mein thi, pata nahi chala kab Hashir apna haath jala baitha.”

To Daadi poochhtin:

“Kya din tha?”

“Mangal ka din tha... aaj hi ke din... bilak bilak kar roya mera beta... main bhi dhaaden maar maar kar rone lagi.”

“Acha, Mangal... aur tareekh kya bani?”

“Tareekh yahi do.”

“Acha... do aur upar se Mangal... Madiha beta! Mangal ki do ko humein yeh wabaal naseeb hua tha... is duniya par Amraha azaab ban kar aayi thi... hamare khandaan mein to har tareekh ‘do’ aur har din ‘Mangal’...”

“Kya karein, gunaahon ke azaab bhi to bhugtay hi padtay hain na...”

Agli baar janab Hashir ke haath jalne ka qissa bhi us najis janam patri mein shamil kar diya jata.

Amma bhi zara khaif si rehtin us se... Ittifaq se har saal lag bhag isi din Maamu ke store par teen baar chori ho chuki thi. Tang aa kar Maamu ne store hi bech diya aur doosra karobar shuru kar liya. Amma ko bhoolta hi nahi tha ke kaise unke bhai ka chamakdaar, damakta, shandaar store bik gaya aur Bhatti sahab kangalay ho gaye.

Ek Dada thay jo paanch waqt namaz parhtay thay aur sirf Allah se dartay... Ahadees par amal karne ki koshish bhi kartay... jaahilana baaton aur khayalat se door hi rehtay... warna Jumeraat ke Jumeraat unke ghar charagh jaltay... teen ya paanch... bas taaq, juft nahi... Daadi marhne walon ke naam mukhassas jagah charagh roshan karwaatin.

"Lamazhab ho sab ke sab... kya kabhi Roza-e-Rasool ﷺ par charagh jaltay dekhe hain? Kyun jalaaf-e-mazhab aisay kaam karte ho?"

Daadi haath se ishaara kartin ke jaayein, apna kaam karein...

Baba ne Azam Market mein qaleen store ki naye siray se aaraish karwai to iftitah ke waqt naariyal phora... Azam Market ke doosray maalikan mehzooz hotay rahe aur Baba sirf itna hi kehtay rahe ke woh filmon mein dekhte thay to unhein bara acha lagta tha...

“Kya hua jo kar liya to... tum sab to kisi ko khush bhi nahi dekh saktay,” Baba ne aisay kaha jaise unki dareena khwab ki takmeel ka mazaaq uraya jana unhein nagawaar guzra ho...

Jumeraat ke Jumeraat biryani ki degain taqseem karne ki riwayat bhi Baba ko bari azeez thi.

Dada ne ek baar kaha...

Hi everyone! 😊

I hope you all are doing great and enjoying the story so far. Just a little note from me — translating this book into Roman Urdu is quite challenging and takes a lot of time and effort

Your support means the world to me, and it really encourages me to keep going! Thank you so much for understanding and for being here with me on this journey. 💖

Stay safe and happy reading!